الي من يقول ان زمن المعجزات انتهي ( معجزة عظيمة حدثت في مارس 2009 بالولايات المتحدة الامريكية)

بسم الاب والابن والروح القدس أله واحد أمين

أنتقال مارك للسماء
11-24-1998 11-24-2008

و
معجزه شفاء ماريا
الولايات المتحده الامريكيه في مارس 2009

اسمي امال واسكن في مدينه تسمي أن اربر بالولايات المتحده الامريكيه وعندي ثلاث أطفال هم اندرو 13 سنه ومارك عشر سنوات وماريا7 سنوات وأولادي وزوجي شمامسه في الكنيسه ولينا علاقه قويه بالشهيد العظيم مارمينا العجايبي جميع اولادي بيحبوه وعمل معانا معجزات كتيره انا وزوجي واتعودنا اننا نذهب الي الريتريت في مدينه تسمي مايوو علي بعد ثلاث ساعات من مدينتنا وفيها كنيسه صغيره جميله وبها جسد القديس العظيم مارمينا نأخد بركته كل مره نذهب اليه يمكن 3-4 مرات في السنه مع عيد نياحه القديس العظيم مارمينا وفي عيد مارمينا 24نوفمبر سنه 2007 بيوافق عيد ميلاد ابني مارك وهو شماس حلو خالص وبيحب المذبح جداا وعمل القربان والشوريه ومحدش ابدا يقدر يمسك الشوريه ما دام مارك موجود في المذبح لانه بيحب يخدم في القداس جداااا وخصوصا في الهيكل ولما ما يخدمش في الهيكل كان يزعل ويعيط ويحس انه ماخدمش وكنا هناك حوالي تلاث أيام وراح مارك طلب من ابونا مينا انه يحتفل بعيد ميلاده وفعلا راح ابونا بعت تاسوني وجابت له تورته كبيره اوووي واحتفلنا بعيد ميلاده التاسع هناك مع مارمينا وجت سنه 2008 وقبل عيد ميلاد مارك باسبوعين قالي يا ماما انا عايز اعمل عيد ميلادي في مارمينا ومش هعمله في أي حته تانيه وقلتله حاضر يامارك وقعدت احضر له التورت علشان نحتفل بعيد ميلاده وبالرغم اني سألته كذا مره يا مارك وعايز تعمل ايه في المدرسه فكان ما يردش عليا كان كل اهتمامه بمارمينا واذاي نروح وكان عيد مارمينا هذه السنه يوم اثنين وكان لازم يغيبوا من المدرسه وقالولي ايوه يا ماما عايزين نروح لمارمينا وبالفعل حضرت كل حاجه ورحنا الدير وعملنا عشيه عيد القديس بكل فرح وبعدين عملنا لمارك عيد ميلاده وكان فرحان جداااا وبعدين عمل التسبحه مع اخوه اندرو ووالده وبقيه الشمامسه . وصحينا الصبح للآحتفال بعيد الشهيد العظيم ولقيت مارك صاحي وبيقولي يلا يا ماما بسرعه هتيلي اللبس بتاعي علشان اعمل القربان بسرعه وكان لسه اخوه اندرو وابوه لسه نايمين قلتله استني يامارك نام شويه حبيبي راح قالي لا انا عايز اعمل القربان يلا وفعلا لبس بسرعه وخد الاجبيه وراح يعمل القربان وكان فرحان جدااااا وبعد ما خلص القربان جري بسرعه علي الكنيسه قبل ما اي حد يروح ولقيته بيملي كل الآكواب الصغيره بتاعه المناوله وقلتله يامارك خلي ده لماريا والبنات راح قالي لالا ياماما انا عايز أعملهم انا وسيبته وكنت مستغربه اوي وبعدين صلي باكر وبدئنا القداس وطلب مارك انه يخدم جوه الهيكل وكان فعلا خادم المذبح في هذا اليوم . وعرفت بعد ذلك ان مارك شرب كل الميه الي ابونا كان بيرش منها وكنت كل ما انظر لمارك الآقيه مشغول اووي بلآواني وانه ينظف الشوريه ويشيل كل الآباريق في مكانها وخد من ابونا قربان كتير اوووي من البركه وأخذنا كلنا بركه التناول وبركه جسد القديس العظيم مارمينا وانتهي القداس حوالي الساعه الواحده ظهرا وقدس ابونا معودنا دايما نفطر مع بعض قبل

ما كل واحد يمشي وعملت فطار لكل واحد من ولادي لكن مارك الوحيد الي رفض ان يفطر وقلت في نفسي خلاص احنا هنمشي واخدلهم شويه سندوتشات علشان الطريق وسلمنا علي مارمينا وغادرنا الدير حوالي الساعه الثانيه والنصف ظهرا وكان الجو فيه ثلج ودي حاجه عاديه بالنسبه لشتاء امريكا وكنا ماشين علي اقل من السرعه وكان امامنا حوالي اربعه سيارات وحاول عربيه نقل كبيره انها تتخطي كل هذه العربات لكنه حاول وفشل لمره ودخل ورائنا وكان ماشي بسرعه تقلق في هذا الجو وكنت مش مطمنه لظهور هذه العربيه النقل فجأه بالرغم اننا كنا ماشين بقالنا حوالي عشرين دقيقه علي الطريق . وابتدئت العربات التي امامنا في التهدئه وحاول زوجي ان يهدي لكن الفرامل تجمدت تحت رجليه بالرغم من اننا كنا لسه في اشاره والفرامل اشتغلت كويس وفجأه دخلنا علي الحاره المعاكسه للطريق لكن حمدنا ربنا ان مافيش اي عربات قادمه لكن في لحظه جت عربيه النقل التي ورانا وصدمتنا وانقلبت السياره ووقعنا في منحدر للاسفل علي جانب الطريق . انا ما غبتش عن الوعي لحظه واحده وكنت سليمه وأدري وأعي كل شئ وهذه هي المعجزه الآولي التي عملها رب المجد معي انا الخاظئه الغير مستحقه ورأيت زوجي انقلب علي كتفي في دمائه وعندما نظرت لآري أطفالي الصغار رأيت مارك في دمائه هو وماريا ولم اري اندرو كنت بأصرخ بشده يا مارمينا يا مارك يا ماريا وحاولت اني أحضن مارك ولكني احسست في هذه الحظه انه طار خلاص للسماء وكنت أصرخ بشده وأفتكرت ان اندروا اتقطع تحت عجل العربه وصرخت يا اندرو يا اندرو وفتحت باب العربيه من ناحيتي لان كل ابواب العربه كانت مغلقه وخرجت من العربيه وانا بأصرخ ولقيت اندرو في أعلي المنحدر بيقولي يا ماما انا هنا وكان سليم وعرفت منه بعد كده انه ماحسش غير بحد قفل عينه وخده من العربيه ولما سمع صراخي لقي حد طبطب علي ركبه وفتح عينيه و أكيد ده ملاك من السماء أو الشهيد العظيم مارمينا لآن كل الآطباء اكدوا لي ان أي شخص بيقع من العربيه وهي في حاله انقلاب بيحصل له حاله كسر في العنق أو حاله شلل أما أندرو كان سليم جسمانيا اشكر الرب علي هذه النعمه والمعجزه الثانيه التي عملها الرب لآسرتي وحاولت اطلب النجده وبعدين رجعت للعربيه وساعدت زوجي علي الخروج من ناحيه بابي وكنت بصرخ بجنون علي مارك وماريا وجت الاسعاف وقالولي ان ماريا ما زالت علي قيد الحياه اما مارك مرضيوش يقولولي حاجه عنه وجت عربات الاسعاف وخذوا ماريا وحطيت معاها صورتين لمارمينا وعربه اخذت اندرو وعربه اخذت زوجي لانه كان متالم جداا وكان بييصرخ من الالام ولقيت البوليس بيجبرني اني اركب عربيه الاسعاف مع زوجي بالرغم اني الوحيده الي كنت سليمه ما حصليش أي حاجه بس قدرت اتصل بابونا في التليفون وعرفته الي حصل وانا في حاله مقدرش اوصفها لكم لكن ابونا اتكلم مع الاسعاف وعرف منهم كل حاجه ووصلنا اقرب مستشفي بعد حوالي ساعه وانا في حاله صراخ شديده وأول ما وصلت ماريا بعدها بخمس دقايق جه الدكتور وعرفني ان مارك مقدرش يجي لانه خلاص راح علي السماء بسرعه اول ما الحادثه حصلت ساعتها جالي هيجان شديد ومعرفتش اني اقول حاجه غير اسم مارك مع اسم مارمينا.
وكانوا لازم يأخدوا ماريا لمستشفي تانيه لانها كانت حالتها خطيره جداااااا عرفت بعد كده انه نزيف وارتجاج في المخ وان المستشفي دي ما تقدرش تعملها حاجه خالص لان البنت بتموت وتوسلت ليهم اني اروح معاها لكنهم رفضوا بشده وماكنتش عارفه اعمل ايه زوجي وابني في حاله خطر وبيعملوا ليهم كل الاسعافات اللازمه وبنتي راحوا بيها مش عارفه فين وابني راح السماء .
ماكنتش حاسه بنفسي غير لما ابونا جالي ووقف جنبي وبعدها بساعتين اندور كان كويس بس قالوا لازم يروح مع زوجي مستشفي تانيه فيها امكانيات اكتر لان كما علمت بعد ذلك ان حاله زوجي كانت خطيره كان عنده حاله نزيف حاد في الطحال وكان ممكن كل الدم يتصفي في بطنه قبل ما نوصل المستشفي وعنده كسر في عده ضلوع بالآضافه لكسرفي الكتف الآيسر وكانوا لازم ينقلوه

مستشفي فورا وعرفت انها نفس المستشفي الي نقلت اليها بنتي ماريا وطلبت منهم اننا نروح الي المستشفي التي قرب البيت لكنهم رفضوا لسؤ الحاله التي كان زوجي فيها وابنتي ولسؤ الجو وقالوا ان اقرب مستشفي علي بعد ثلات ساعات معني هذا ان ممكن زوجي يموت في الطريق في عربيه الاسعاف قبل وصوله لاي مستشفي وعلمت ايضا ان ابنتي كانت حالتها متدهوره لدرجه ان عربيه الاسعاف وقفوا في بلد تانيه بها مستشفي لانها كانت بتموت منهم لكنهم رفضوا وقالوا كملوا بيها ولو ماتت تبقي خلاص وبالفعل كملوا بيها الي المستشفي المتخصصه .
وركبت مع عربه الاسعاف مع زوجي من الساعه السابعه ووصلنا حوالي الساعه العاشره وفي اثناء الطريق عاتبت مارمينا كتير وقلت لربنا انت أنقذتني انا بس علشان اشوف كل عائلتي في دمائهم كده يارب ياريتني كان حصلي حاجه معاهم ليه انقذتني انا علشان تجرح وتكسر قلبي كده ده أكبر عذاب ليا يارب وكنت ناسيه معونه وأيد ربنا خالص
وقدس ابونا كان ورائنا في عربه أخري وكلم قدس ابونا معظم الاصدقاء الآطباء اللذين يعملون في المستشفي ووجدتهم مع ماريا وكانوا منتظرين وصول زوجي ايضا لدخوله غرفه العمليات لاستئصال الطحال فورا لكن فوجئوا ان النزيف ابتدأ يقف وهذه هي النعمه والمعجزه الثالثه من الرب أنه أضاف عمر جديد لزوجي ولم يشأ الرب ان أصبح أرمله لآن كل الآطباء أكدوا لي ان زوجي كان لآبد أن يموت في هذه الحادثه لآنها بالفعل حادثه موت .
أما ماريا كانت في العنايه المركزه وطلب مني الدكتور ان اوقع اوراق لعمل انبوبه في الرأس لمحاوله شفط النزيف في المخ وسمحوا لي ان اراها وكنت في حاله انهيار تام وكان قدس ابونا معايا بيسندني وقلت له قولها قومي يا ابونا ذي ما السيد المسيح قال لابنه ييرس قومي يا صبيه لاني رأيت ما ريا ابنتي كعروسه لعبه وكل حاجه بتشتغل بالمكينات التنفس صناعي والقلب وخراطيم كتيره متوصله ليها وكانت في حاله سيئه جدااااااامع شرخ في الفخد الآيسر وكسر في اخر فقره من سلسله الظهر وكسر في الكتف الايسر مع أحتمال ان العنق غير سليمه .
علمت بعد ذلك بأن حاله ماريا كانت في طريق الموت سائره وكانت الحاله ميئوس منها لدرجه انه توجد هيئه مسئوله عن التبرع بالآعضاء الجسديه بعد الوفاه في حالات الحوادث والحالات الميئوس منها لنقلها الي أخرين في احتياج اليها وجاءت هذه الهيئه الي دكتور المخ ودكتور العنايه المركزه بعد وصول ماريا للمستشفي بعده ساعات ليطلبوا منهم أعضاء ماريا لانهم كانوا واثقين ان الحاله ميئوس منها ولكن الدكاتره قالوا ليهم نديها وقتها والرب قادر علي عمل كل شئ لصالحها وكان بعض من الدكاتره عايزين يقولولي روحي حضري ليها الجنازه مع أخوها لكنهم كانوا شايفيني منهاره ومش بعمل حاجه غير اني ماسكه الاجبيه وبصلي في حاله انهيار وبكلم كل صور القديسين ومنهم القديس العظيم مارمينا العجايبي والقديس العظيم ابي سيفين وامنا ايريني والبابا كيرلس السادس وعلي راسهم الست العذراء كنت بكلمهم في حاله جنون ورحت حطيت كل الصور علي راس السرير بتاع ماريا لدرجه ان الممرضات استغربوا من كل هذه الصور وكل ما حد يجي المستشفي ويجيبلي صوره احطها معاهم وقدس ابونا مينا وقدس ابونا مكسيموس كانوا بيجوا كل يوم يرشموا ماريا ويصلوا من أجلها وابتدت الكنيسه كلها تصلي في وقت واحد كل يوم الساعه التاسعه مساءا من أجل ماريا وأجتماعات الصلاه في كل مكان أمريكا وكندا ومصر والكل كان بيبعت ايملات من أجل الصلاه لماريا علشان ربنا ينقذها من الموت ومن حاله الغيبوبه .
واعطاني قدس ابونا مينا كتاب أمنا أيريني الثالث عن السماء وحقيقي كان كتاب معزي جداا عرفني اد ايه السماء حلوه وفيها حاجات كتير جميله أحلي من الارض وكنت كل يوم أقره فيه علشان ابعد عن الآفكار المؤلمه و كنت كل ما أقرأ معجزه أقوله يا ابي سيفين ما تعمل معجزه مع ماريا ذي كل المعجزات دي بص علينا بعين الرحمه عايزين معجزه لماريا وكنت ابكي بالدموع لن ولم أقدر ان أصف لكم الحاله التي كنت فيها لا يعلمها الآ الله وحده .

وكانت أخطر ايام في اليوم الثالث بعد الحادثه لان الآطباء قالوا لي انه من اليوم الثالث يبدأ المخ في التورم الي اليوم الخامس وكنت منهاره في البكاء واطلب شفاعه جميع القديسين واقولهم تعالوا اشفولي ماريا ابوس ايديكم واقول لمارك تعالي الحق اختك هات مارمينا وتعالي يا ابني وصلي لماريا أمام عرش النعمه .

واشكر الرب انه تمجد وفعلا مرت الايام من غير اي ارتفاع في ضغط المخ أو أن النزيف يشتد لانه في حاله اي أزدياد في ضغط المخ كانوا هيفتحوا المخ ومحدش عارف كان ممكن يحصل ايه مع ماريا .وكان جميع الدكاتره معانا بروحهم وعقولهم وصلواتهم فالكل مهتم بينا وبيعزونا بوجودهم معانا و الجميع بيصلوا من أجل ماريا .
أما زوجي فحالته اتحسنت ووقف النزيف اما حاله الكسور فقيل له مع الوقت هتخف وانها محتاج الي وقت كثير لكي تشفي واشكر الرب من كل قلبي علي نعمته العظيمه .

وكنا لازم نودع مارك وحقيقي كان الموقف صعب جدا عليا لكن ابونا لم يتركني وكان بجانبي في كل شئ وكذالك اتت خالتي وابنها بيتر وخالي وزوجته وابنهم من كندا للوقوف بجانبي لآني لوحدي في امريكا كل عائلتي في القاهره وليس لي اي اقرباء في امريكا لكن الكل في الكنيسه من شباب وصغار وكبار كانوا اهلي وأكثر الكل وقف بجانبنا أكتر من ألاهل وصلوا من أجلنا كتير جداا وعملوا لمارك كل شئ في الجنازه من ترتيبات ربنا يبارك ويعوض الكل تعبه أضعاف يارب .
وأعطتني خالتي صوره للملاك ميخائيل ووضعناها عند مارياوتشفعنا به وقلتله يا ملاك ميخائيل خليك مع ماريا وكانت معظم الممرضات يعرفون الملاك ميخائيل لكن كانوا دائما يسألون عن باقي صور القديسين لانهم أحسوا برهبه كبيره في الغرفه وان الغرفه مليانه سلام ببركه جيمع القدسين .

و كنت لازم اروح وأختار لآبني كل شئ لآتمام الجنازه وكان زوجي مازال بالمستشفي وكان الموقف رهيب علي أي أم وهي تختار لآبنها ملابس دفنه مع الصندوق الذي سوف يستقر فيه جسديا وكنت لآ أدري اذا كنت صاحيه أو ده حلم مزعج أحلم بيه كنت في حاله سكوت تام مع انهيار وكنت اشعر بأيد خفيه وراء ظهري تحركني وكان ابونا معايا لم يتركني هو وخالتي وخالي وأم حنونه من ان اربر لم تتركني لحظه واحده منذ الحادثه ربنا يعوضها كل خير علي محبتها فكانت تعتني بأندرو في المسشتفي وتهتم بيه مثل ابنها وبالفعل اخترنا كل شئ لمارك وفي يوم الجنازه أحسست بان الرب عايز يقولي ان السماء فرحانه بدليل ان كل أيام الاسبوع كانت ثلج وبرد شديد اما يوم السبت الموافق 29-نوفمبر-2008 كان يوم جميل الشمس مشرقه جداا والجو دافئ وكل السماء صافيه ما فيهاش اي سحابه واحده لدرجه ان كل الناس احسوا بأن الرب عايز يقول ان السماء فرحانه بزفاف مارك للسماء وبالفعل زفينا مارك للسماء بفرحه جميله وكانت كل الناس موجوده لدرجه ان الكنيسه كانت مليانه علي ألاخر زي ما يكون أحتفال كبير والكل لازم يحضروا
الكل جه يزف مارك معايا للسماء وكما قالوا الناس لي اني كنت بقول مارك في حضن مارمينا هو معاه هو طار لمارمينا هو في السماء مع يسوع وكما فال رب المجد أكرم اللذين يكرمونني كان تكريم لمارك تكريما حافلا للسماء.

واتصل بي قدس ابونا أنجيلوس من كندا علشان يعزيني في نفس اليوم وقال لي كلمه حلوه جدا مش ممكن انساها قال لي يا أمال عايزه ايه هديه أكتر من السماء ربنا يديها لمارك في يوم عيد ميلاده مافيش أحلي وأغلي من كده هديه من ربنا لمارك وعزتني جدا الكلمه دي من قدس ابونا
لكن احساس الام والاب بيكون صعب في بعض الاوقات وأذا كنا مؤمنين ان مارك ما زال عايش في السماء لكننا مفتقدينه بالجسد والعين المرئيه فصلوا من أجلنا لكي يعزينا ربنا ويرسل لنا التعزيه من عنده وان يمنحنا السلام والآطمئنان لقلوبنا .
عاتبت مارمينا كتير جدااا بدموع الام النازفه من قلبها وقلتله كده برضه يا قديس الرب ده كله يحصل واحنا رجعين من الدير ده انا ندهتك ليه مرفعتش العربيه ليه مزحلقتناش في المنحدر قبل ما العربيه النقل تضربنا وليه ماضربناش في العربيه التي امامنا وليه وليه وليه ده انت عجايبي يا مارمينا طب مش تعمل حاجه فين مارك ليه خدته انا عايزاه يامارمينا هاتوا ليا بلاش تأخده كده مني وتحرمني منه في يوم عيد ميلاده ليه بس ليه يا مارمينا انا عايزه مارك يا مارمينا ده الي بيروحوا ليك من غير عيال بتديهم عيال وانا رحتلك بعيالي تأخد مني ابني لا يا مارمينا انا عايزه مارك وانا رحتلك بماريا سليمه رجعهالي سليمه يا مارمينا من فضلك وكانت الافكار بتقتلني حقيقي وكنت بأفكر بالجسد ونسيت ان مارمينا هو الي طلع اندرو بره العربيه خالص ورفعه لفوق ونجاني انا من اي جرح ولو بسيط ونجي زوجي الذي لابد وان يموت في مثل هذه الحادثه لانها حادثه موت ونجي بنتي من الموت المحقق ليها بس ساعات اقوله ليه مارك اشمعنا مارك يارب .
وكانت الافكار بتقتلني انا وزوجي وكنت منهاره في حاله من البكاء وكانوا الكهنه بيعزونا بكلامهم الروحي الهادئ وقدس ابونا مينا قالي دي حكمه ربنا احنا لا نعرفها ولا نفهمها لكن نثق في الرب
إن عشنا فاللرب نعيش وإن متنا فاللرب نموت إن عشنا أو إن متنا فاللرب نحن

وقال لي قدس ابونا مكسيموس الرب اعطي الرب أخذ ليكن اسم الرب مباركا الي الآبد وخلي دايما اتكالك علي الرب الهك فهو يدبر كل الاشياء لعمل الخير للذين يجبون الله

وقال لي قدس ابونا يوحنا الذهبي في كندا يا امال قولي دائما الآيه دي:
7:13"‏لست تعلم أنت الآن ما أنا اصنع ولكنك ستفهم فيما بعد" يوحنا
حقيقي اني لست افهمك يارب ولكن أنا واثق فيك وأثق انك بتعمل كل حاجه لي للخير.

ورجعنا الي المستشفي وكانت حاله ماريا لسه ما فيش أي تحسن وفضلت تحت التنفس الصناعي ومحدش عارف اي حاجه عن حالتها وهتوصل لايه؟

وفي يوم الاثنين فوجئت بأن الممرضه قالت ان ماريا جالها حاله صرع وانا كنت موجوده لكن انا احسست ان ماريا اتشنجت ذي ما تكون خافت من حاجه لكن الممرضه اسرعت وابلغت الطبيب واحضروا طبيب متخصص في المخ والاعصاب وقال ان ما حدث ممكن ان يكون حاله صرع بالفعل وانها لازم تأخذ دواء لهذه الحاله لان الحادثه كانت حادثه موت وأمر ان يتم رسم مخ لماريا علي مدار الاربعه وعشرين ساعه مع تصويرها بكاميرا الفيديو لكي يروا ماذا يحدث لها وبكيت وقلت لهم مش ممكن ان بنتي يكون عندها حاجه ذي كده احنا علطول بنتناول وما فيش أي حد في الاسره عنده اي نوع من هذا المرض خالص لكن طبعا الاطباء هنا لم يهتموا بكلامي لان من وجهه نظرهم هما دائما صح وبالفعل ابتدوا يعطوا ماريا دواء لمرض الصرع ونظرت الي صوره رب المجد والسيده العذراء وقلت ليهم الحقونا انا خلاص مش قادره استحمل اي حاجه خلاص وخصوصا ان ماريا مازالت في غيبوبه ومش حسه بأي حاجه وبكيت بشده وكنت علي وشك انهيار عصبي . ولكن الرب تمجد ومحصلش أي حاله من حالات الصرع تاني لماريا ومرت الايام علي خير ولكن الآطباء قرروا ان ماريا لآزم تفضل تأخذ دواء للصرع لمده سنه علي الآقل .
وفي يوم الثلاثاء جالي قدس ابونا مينا وابونا مكسيموس وصلوا لماريا و رشموها بالزيت وكانوا بيعزوني كتير جدااا بكلامهم المعزي وبعد الظهر جالي قدس ابونا مرقص من كندا وصلي لماريا ورشمها بالزيت وعزاني قدس ابونا بكلامه وقال لي قولي دائما لتكن مشيئتك يارب لا مشيئتي وأن مارك قريب جدا من العرش السماوي ذي ما كان بيحب وجوده في الهيكل علي الآرض وان حافظ الآطفال هو الرب وربنا حافظ علي مارك بطريقته هو انه خده معاه للسماء وفرحه بيها وحافظ علي اندرو وحافظ علي ماريا وصلي من أجلي كثير لاني كنت في حاله بكاء شديد جداا.
وبعديه بساعتين جالي قدس ابونا يوحنا الذهبي من كندا ومعاه جسد القديس العظيم موسي الاسود ووضعه علي ماريا لمده ساعه وصلي ليها ورشمها بالزيت .

في هذا اليوم أحسست بتعزيه من السماء وقلت في نفسي ماريا اترشمت كتير اوووي النهارده بالزيت اعملوا حاجه يا قديسين ارجوكم وبكيت بشده أمام صوره رب المجد وقلتله انت اب حنين يارب لو تقبل ان ماريا تكون بالشكل ده وعينيك تشوفها كده خلاص متعملش حاجه لكن انا عارفه ان ماريا متهونش عليك يارب وانت الاله الحنون والطبيب الشافي لينا من فضلك يارب اتحنن علي ماريا وعلي عبدتك الضعيفه يارب وانهرت في البكاء وبعدها أحسست بسلام

وكان تاني يوم الآربعاء عشيه عيد القديس العظيم ابي سيفين ولي صديقه من الكنيسه اتصلت بدير ابي سيفين ووضعت اسم ماريا عند جسد ابي سيفين وأمنا ايريني وعرفت كل الرهبات بكل شئ ووعدوها انهم هيصلوا من أجل ماريا .وكانت أجتماعات الصلاه في كل مكان بعد العشيه في كنيسه العذراء ميسساجا في كندا ابونا عمل أجتماع للصلاه للجميع من أجل ماريا والكل كان بيصلي .
وأحسست في يوم العشيه ان جلوسي بجانب ماريا لا يفيد بشئ وقلت لنفسي اني سوف أذهب للكنيسه بكره في قداس ابي سيفين وأطلب منه انه يشفي ماريا في عيده وبالفعل تركنا المستشفي انا وابن خالتي بيتر الذي جاء من كندا وجلس معانا كل الوقت وكان يخدمنا وخصوصا اندرو الذي كان يرتاح معه لقربه من نفس السن تقريبا وكان بيتر يجيب علي اسئله اندرو ويطمنه علي مارك وكان بيتكلم معاه ويصلوا كتير وكان بيعزيه في امور كتيره

ومن اول يوم أتي بيتر الينا وكتب ايه جميله معزيه لماريا في غرفتها بالعنايه المركزه وهي:
( انا اضطجعت ونمت ثم استيقظت لآن الرب ناصري ) المزمور الثالت ألايه الخامسه
وطلبت من بيتر انه يوديني الكنيسه يوم الخميس 4 -12-2008 للآحتفال بعيد الشهيد العظيم ابي سيفين وفعلا أخذني بيتر وذهبنا الي الكنيسه وبكيت كتير في القداس لآني احسست اني شايفه مارك جــوه الهيكل ذي مـا كان دائما بيحب يخدم ولما رأيت الآطفال الصغيره بتتناول بكيت بحزن لآني كنت مفتقده ابنتي جداااا وكل عائلتي ولآول مره احسست اني في الكنيسه لوحدي بدون زوجي ولا أولادي كان أحسـاس فظيع ومرير ومقدرتش أوقف نفســـي من البكاء وكانت دمـوعي تجري علي الارض وقلت مش همسحها يارب وخليها علي الارض علشان تتحنن علي عبدتك أنا عارفه انـك حــنين ومش بتستحمل الدموع وقلت ليه يارب ماتسمحش أبدا أني اكـون في الكنيسه لوحدي تاني مـن غير زوجي ولا أولادي كان احساس مملؤ بالالآم قلبـي كان مكسور جدااا وكنت انظر لصوره ابي سيفيــن وابكي علي الارض واقوله يا شهيد الرب انا سيبت كل حاجه وجيتلك في عيـدك ممكن تســيب انت كل حاجه وتروح تشفي لي ماريا بنتي أرجوك ابوس ايديك انا جيتلك لحد عندك روح أنت لماريا وقومهالي في يوم عيدك من فضلك وكنت ابكي بمراره لا أحد يتصورها غير الرب .

خرجت انا وبيتر بعد القداس وابونا أعطاني بركه من الحمل وقلي متخافيش ولما خرجنا من الكنيسه أحسسـت بسلام وأمان ملآ قلبي وكياني كلي و لقيت التليفون رن وكانت صديقه من الكنيسه بتقولي متخافيش يا امال احنا كلمنا ابونا أنجيلوس الآنطوني وهو قال ان ماريا هتقوم هتقوم هتقوم وساعتها بيتر قالـي ماتخافيش يا طنط ابونا انجيلـوس من السواح ومادام قال ان ماريا هتقوم تبقي هتقــــوم وكمــلنا الطريق للمستشفـي وكان بيتر بيعزيني بكلامه الحلولآنه هو شماس حلو خالص في كنيسته ودخلنا لمـاريا في العنايه المركزه وفوجئنا بأن وجه ماريا أتغير تماما ولاحظنا انها شبه نائمه وان وشهــــا مختلف تماما عن ما كانت وجه طفله نائمه في السرير فتعجبنا لآن وجه ماريا كان فيه ألم ومتشوه كثير اووي وقالي بيتر يا طنط انتي ملاحظه ايه علي وش ماريا قلتله ذي ما تكون نايمه يا ابني راح قالي شوفتي يا طنط ربنا بيشتغل وسألنا الممرضه عن حالتها وكانت أول مره تقول لينا ان ألاشعه الي بيعملوها لماريا كل يوم علي المخ أحسن كتير جدااا النهارده واحسست ان ابي سيفين جه هو ومارمينا والست العذراء وامنا ايريني والبابا كيرلس ومارك وعملوا كل شئ لماريا وجلست انا وبيتر نصلي بحراره وبعدها بخـمس ساعات أتي أحد الاصدقـاء من الكنيسه ومعاه الستر بتاع القديس العظيـــم ابي سيفين وقالي خليه علي ماريا لحد ما تقوم بالسلامه ان شاء الله واحسست ان القديس العظيم أبي سيفين عايز يقولي حاجه في يوم عيده عايز يقولي انا عملت لماريا كل شئ خلاص ومافيش أيد بشريه تاني هتمتد أليها وتأكدت من ذلك علشان الستر يجي لي في يوم العيد بالذات وفرحت جداا ان الستر معانا ووضعته علي جسد ماريا طول الوقت وكنت كل ما أنظر الي صوره أمنا أيريني فوق سرير ماريا احس انها تقول لي متخافيش بنظرتها الحنونه الطيبه وأقولها انتي ام حنونه صلي من أجل ماريا أرجوكي هاتي مارك وتعالي ليها وألمسيها بأيديك الحنينه أنتي والست العذراء كنت بصلي كتير وبأقول كلام كتير للقديسين علشان يرحموني ويرحموا ماريا .

وفي يوم الجمعه 5-ديسمبر-2008 لقينا ماريا فتحت عينها لمده عشر ثواني ثم قفلتها وفرحت جدا وبصيت علي ستر ابي سيفين وقلتله اشتغل من فضلك ونظرت الي صوره امنا ايريني وحسيت انها بتقولي ماتخفيش ماريا هتقوم افتكرت اني بهلوس لكن كل ما كنت بشوف صوره امنا ايريني فوق رأس ماريا احس انها بتقولي متخافيش وكنت ابكي بشده .

وجاء يوم السبت 6-ديسمبر-2008 وكان ميعاد ان ماريا تعمل عمليتين واحده لوضع انبوبه في الرقبه لآن الدكاتره قالوا ان وضع الآنبوبه في الآنف والفم أكثر من اسبوعين عليه خطوره بعد ذلك علي التكلم والآحبال الصوتيه وانه من اللازم انه يتم وضع انبوبه في الرقبه للتنفس من خلالها وعمليه أخري في المعده ووضع انبوبه بها لتتم عمليه الغذاء عن طريقها وأمداد ماريا بالسوائل والادويه عن طريقها لانها كانت فقدت حوالي عشر كيلو جرام من وزنها وحقيقي كنا كلنا والدكاتره خائفين من العمليه وخصوصا انها مازالت في غيبوبه أما انا فبكيت أمام صوره العذراء وامنا ايريني وقلتلهم من فضلكوا اعملوا انتوا العمليه لماريا ومتخلوش اي دكتور يعمل ليها اي حاجه وطلبت من الدكتور اني اخلي صوره السيده العذراء وصوره أمنا ايريني علي حافه السرير ولزقهتم بالتيب علشان ميقعوش ومحدش يشيلهم اثناء العمليه وبالفعل أكد لي الدكتور ان ما فيش حد هيشيلهم خالص ودخلت ماريا غرفه العمليات الساعه الواحده ظهرا و بعد حوالي ساعه جه دكتور المخ وقال لينا ان الآشعه الي عملوها لماريا في الصباح كانت حلوه جدا وأكدت ان خلاص مافيش نزيف تاني في المخ وانه ممكن نشيل الانبوبه التي في المخ ونشوف لمده كام يوم لو ضغط المخ مازادتش يبقي بركه من الرب لكن لو زاد هيفتحوا تاني وقال لينا انه هيدخل غرفه العمليات ويشيل الانبوبه وبالفعل فرحنا بالخبر ده

وقلنا يا رب كمل شفاء ماريا . وخرجت ماريا الساعه الثالثه بعد الظهرمن غرفه العمليات وكان اول حاجه يقولها لينا الدكتور ان كل شئ حلو خالص ولم تواجهم اي خطر اثناء العمليه وخصوصا ان ماريا كانت لا تقدر ان تتنفس طبيعي أو من نفسها والحمد لله ببركه الست العذراء وامنا ايريني هما الي عملولها كل حاجه ونزلت ماريا للعنايه المركزه تاني في الدور الثاني وكانت غرفه العمليات في الدور الرابع وبعد حوالي عشره دقائق من نزول ماريا تحركت الانبوبه التي في العنق وكانت معاها ثلاث ممرضات وفي هذه الحظه كان الدكتور بيمر وصرخ بسرعه للمرضه انها تنادي علي الطبيب الي عمل ليها العمليه وارتبكوا كلهم لان الانبوبه اتخلعت من مكانها ودخل هواء تحت الجلد وده كان معناه ان ماريا لم تتنفس ونزلوا كل الدكاتره من الدور الرابع وماكنش فيه اي وقت انهم يأخذوا ماريا تاني لغرفه العمليات والكل ارتبك جدا وخرجوني انا وبيتر وزوجي من الروم ولقينا واحده من الممرضات جريت بسرعه علي الروم بتاعه التمريض واذا بها تخرج فرحانه متهلله لانها وجدت كل شئ الآطباء يحتاجوه من عده ومقاسات للانبوبه داخل ملايه وملفوفه ومعقمه وكأن حد كان موضبهم ويديهالها في ايديها وخرجت وهي تقول لولا صلواتكم احنا مش ممكن نلاقي العده دي هنا علشان ده لازم يكون مكانها في غرفه العمليات فقط أذاي نلاقيها هنا ده أكيد من الصلوات بتاعتكم وفعلا لحقوا ماريا وحطوا انبوبه تانيه وشفطوا الهواء من تحت الجلد وده كله بفضل وشفاعه الست العذراء اولا وأخيرا و أمنا ايريني لانهم بالفعل عملوا لماريا العمليه .

وفي يوم الآحد فتحت ماريا عينها عده مرات بس ماكناش عارفين هل يا تري هي شايفانا ولا لآ لآنها كانت لآ تقدر ان تتكلم فأتي أحد الآطباء وحاول ان يتكلم معاها وقال لها ان كنتي سامعانا فحركي صباعك الايمن وفعلا حركته الي اعلي وكانت فرحتي كبيره جدا لما احسست انها سامعه لكن ما كنتش شايفانا لان كما قال الدكتور ان الآصابه جاءت بجانب مركز العين في المخ وكانت حدقه العين الشمال كبيره جدا عن حدقه العين اليمين وبكيت تاني لاني رائيت حول في عين ماريا وقلت للقديسين كملوا معجزتكم اوعوا تسيبوا حاجه وراكم .

وفي يوم الاثنين اتي رئيس العنايا المركزه بنفسه وقال لي ان ماريا عندها بكتريا في الرأس وهيخدوا منها تحليل نخاع شوكي لآنهم شاكين ان ممكن هذه البكتريا تكون انتشرت في المخ وهذا سوف يسبب موت لماريا واكد لي ان ممكن انها لا تمت من الحادثه ولكنها ممكن ان تموت من البكتريا لو كانت انتشرت في المخ وهنا بكيت بحاله هيستريا امام صوره الرب يسوع وقلتله اتحنن عليا يارب ومتسمحش ان كلام الدكتور يطلع صح انت الطبيب الحقيقي يا يسوع قله يقولي ايه انت يارب لاني مش قادره اسمع كلام من البشر تاني وبكيت امام كل الصور التي علي سرير ماريا وبالفعل اخرجوني من الغرفه وابتدأوا ان يأخذوا العينه لكن عنايه الله كانت عجيبه بعد ما ارسلوا العينه الي المعمل اتي الدكتوربعدها بثلاث ساعات وهو مبتسم وقال لي ان ماريا مافيش اي حاجه انتشرت في المخ وهي بس بكتريا حولين الانبوبه التي كانت موضوعه في الراس وهنديها مضاد حيوي لمده اسبوعين وهنعمل تحاليل كل يوم ونشوف وهنبتدي نقلل الادويه المنومه ونشوف قدره ماريا علي الصحيان وأدركها لكل الي حواليها . وساعتها نظرت الي صوره رب المجد وقلت له الف شكر وحمد ليك يارب كمل العمل الذي بدأته واتحنن علي ماريا يارب دي بنتك .

وفي يوم الثلاثاء أتي فريق من العلاج الطبيعي وحاولوا ان يحركوا ماريا من السرير لكنها كانت في حاله سيئه ,احسست ساعتها ان ممكن ماريا تكون متخلفه عقليا أو انها لم تعد قادره علي الحركه ولم أقدر ان اري هذا الموقف وبكيت بشده وكنت اتكلم مع صوره رب المجد واقوله اتصرف يارب لو عايز تخليها بلاش تخليها عايشه متعذبه علي الارض انا مش هقدر استحمل كده يارب أو تأخدها عندك مع أخوها مارك وكنت ابكي علي الارض في حاله هيستريا وكنت بصرخ واقول ساعدها يا مارمينا وانت يا ابي سيفين كمل عملك ارجوك ابوس ايديكم يامارك تعالي لآختك وساعدها انت دايما كنت بتقول اني انا بأخد بالي من ماريا يا ماما وجلست اصلي وانا في حاله من البكاء الشديد واتي لي الدكتور وقال لي بالحرف الواحد صدقيني احنا كلنا مش عارفين ايه الذي سوف يحصل لماريا كله بأيد ربنا ربنا عنده كتير أحنا عباره عن أدوات كلها وأجهزه وماكينات أما الصلاه بأيمان فهي اكبرشئ ممكن ان يغير كل شئ علي الآرض .
ووعدني انه سوف يتصل بمستشفي جامعه ميشيجن التي في ان اربر لتحويل ماريا الاسبوع القادم لها بسياره الاسعاف اللازمه وكل التجهيزات لتكمل مرحله اخري في العلاج لو الامور مشيت علي ما يرام وده معناه ان ضغط المخ والدم ثابتين وبلا مشاكل وهذا افضل لماريا ولي اننا سنكون بالقرب من منزلنا لان منذ الحادثه وانا مازلت في المستشفي مع ماريا ولم اذهب الي بيتي وكان اندروا فرحان جدا بهذا الموقف لاني كنت بعيده عنه كل هذه الاسابيع و كان يأتي الي المستشفي في يومي السبت والاحد فقط .

وبالفعل مر الاسبوع من غير اي مشاكل طبيه وكانت حاله ماريا تتحسن بشكل ملحوظ لكل الآطباء لدرجه انهم ما كنوش مصدقين انها تتحسن بالشكل ده وعملوا ليها عمليه تانيه في العنق وصغروا فتحه الانبوبه التي تتنفس منها لمده يومين وبعدها الدكتور أغلقها لفتره ساعه واحده وكانوا ,يشاهدوها وهي تحاول التنفس طبيعيا واشكر الرب انها قدرت ان تتنفس طبيعي لمده ساعه كامله بدون اي مشاكل وهذا شجع الدكتور ان يغلق الانبوبه نهائيا وتبدئ ماريا حاله التنفس الطبيعي وأحسست بمنتهي الفرحه لاول مره احسست ان ماريا قادره علي عمليه التنفس طبيعيا ببركه رب المجد وشفاعه جميع القديسين الذين اتشفعت بيهم .

ونقلنا ماريا بعربه الاسعاف المجهزه الي مستشفي جامعه ميشيجن في أن اربر وهي من اكبر مستشفيات امريكا في علاج الآطفال لتبدأ ماريا مرحله جديده في العلاج الطبيعي وبعد الكشف عليها واجراء كل الآشعات والفحوصات الكامله اتي الدكتور وقال لي انا وزوجي ان ماريا ممكن تتحسن بعد سته شهور وانه لازم يكون فيها حاجه معاقه من الحادثه ولكن مش عارفين اي وجهه للآعاقه هتكون لكن لابد من وجود أعاقه لآن ماريا اتعرضت لنزيف حاد مع أرتجاج في المخ وهذا طبيا يؤدي الي وجود أعاقه ( مثل ممكن تتشل في النصف الآيسر من جسمها أو تمشي بعرج أو يكون عندها تخلف عقلي أو تصبح عمياء لا تقدر ان تري لآن الآصابه كانت بجانب مركز الآبصار) وحقيقي سود الدنيا كلها في وجهي ثانيا وبعد المقابله انهرت انا وزوجي في البكاء وقلت له ما تسمحش يارب بأي حاجه من الي الدكتور قالها انا مش هسمع كلامه انا هسمع كلامك انت يارب قول يارب للدكتور يقولي ايه أنت يا يسوع الي ترشده وتقوله أرجوك يارب أرحمنا أرحمنا وجلسنا انا وزوجي نصلي بحراره ودموع ليتمجد اسم الرب في ماريا .

وابتدأت ماريا مرحله العلاج وكل الناس كانت تصلي من أجلها وفي كنيستنا أجتماعات الصلاه من أجل ماريا لا تنقطع واتفقوا ان الجميع يصلوا في بيوتهم كل يوم الساعه 9 مساء في نفس الميعاد كل يوم ليتمجد اسم الرب في ماريا وكل الكهنه الذين يعرفونها يرفعوا الحمل بأسم ماريا في كل قداس يتعمل وأبتدأت ماريا في تحسن ملحوظ جداا والمخ ابتدي يرجع يشتغل بصوره طبيعيه كل يوم في تطور وكان الجميع يشهد بأن ده حاجه غريبه وانها لآزم تأخد وقت اكثر من ذلك في استرجاع نشاط المخ لكن بركه وشفاعه جميع القديسين كانت اكبر من أي تصور بشري .

وأبتدأت ماريا في الكلام وقدرت تأكل بصوره مبسطه وبدأت تمشي عده خطوات معدوده وتحسنت حالتها بصوره تفوق كل عقل وكان كل الدكاتره والممرضات مش مصدقين التحسن في حاله ماريا في هذا الوقت القصير جدا .

وفي يوم16- يناير-2009 كان قرار الدكاتره اننا نرجع البيت ونكمل علاجها في مركز مخصوص للعلاج الطبيعي في اصابات المخ لكن تحت اشراف الآطباء وان تكون ماريا علي كرسي متحرك لمده ثلاث شهور وكم كانت فرحتي انا وماريا اننا سوف نرجع الي البيت بعد كل هذه الايام في المستشفيات فكم كانت هذه الايام أيام مريره وطويله .

وابتدأت ماريا مرحله جديده في العلاج كل يوم من ايام الاسبوع بيكون عندها التمارين لآستعاده قدرتها علي المشي وأعاده عضلاتها للحاله الطبيعيه مره اخري – التحدث لامكانيتها علي التكلم واسترجاع المخ لكل شئ –والمهارات لكي تتمكن من أعاده صوابعها مع أشارات المخ لكل شئ من جديد .وفعلا ماريا كانت بتتحسن بصوره جيده للكل .

وفي يوم 30- يناير-2009 كان ميعاد ماريا انها تقفل عمليه الانبوبه التي في معدتها وبالفعل تم نزعها وقال الدكتور ان ماريا تقدر الان ان تأكل طبيعيا واذا تم اي تسرب من المعده سوف يعملوا ليها عمليه تانيه لكن ببركه رب المجد ابتدي الجرح يقفل لوحده وهي في حاله صحيه جيده جداا نشكر المسيح عليها وكل ما حدث لماريا من معجزات هي المعجزه الرابعه لآسرتي اشكر رب المجد عليها لحنانه وعطفه وحبه لينا .

وفي يوم 6- فبراير-2009 كان ميعاد ماريا مع دكتور العيون ليقول لينا ما وصلت له عين ماريا وخصوصا العين اليسري لان ماريا كانت في بعض الاوقات تشوف كل شئ مزدوج وبعض الاحيان لا تري من الناحيه الشمال لكن احنا كنا واثقين ان الذي بدأ سوف يكمل وأن القديس العظيم ابي سيفين مش ممكن هيسيب حاجه وراه خالص ولكي يتمجد اسم الرب عملوا لماريا كل الانواع من الفحوصات الطبيه لعينها وقالوا بالحرف الواحد ان ماريا بتشوف كويس جداا وان الشبكيه سليمه والعين سليمه جدا ولم يحدث اي ضرر بها وده من الحالات النادره التي تحدث بعد الحادثه وان حاله الحول البسيط عند ماريا ممكن يضيع بعد عده شهور من الحادثه ولو ان العين مرجعتش ممكن يتدخلوا بعمليه بعد سته شهور وده لكي يضمنوا ان المخ قد شفي تماما لكن انا واثقه ان ربنا مش ممكن هيسيب ماريا لآيد الدكاتره لآنه هو الطبيب الشافي فعلا وأن القديس العظيم ابي سيفين عمل كل حاجه لماريا في يوم عيده مع الشهيد العظيم مارمينا والبابا كيرلس وتماف ايريني ومارك وعلي رأسهم الست العذراء أم النور التي ماريا علي اسمها لآنها مولوده يوم نياحه الست العذراء في 29 يناير 2002.

وفي يوم 20 من فبراير 2009 كان أول لقاء مع الدكتور لماريا بعد ما خرجت من المستشفي وقال لنا الدكتور بالحرف الواحد انها معجزه من عند الرب لكن مازالت ماريا محتاجه للعلاج الطبيعي لمده ثلاثه شهور كامله لكنها بتتقدم في العلاج بشكل ممتاز ولكن لكي تقدر ان تلعب وتجري مثل بقيه الاطفال وان تقدر ان ترجع الي المدرسه مره أخري ولحياتها الطبيعيه .
فصلوا من أجلها لكي يتم الشفاء الكامل لها بأذن رب المجد وشفاعه جميع قديسيه مع مارك ابني
أكتب لكم كل هذا لكي اعترف بجميل رب المجد عليا وأن تكون سبب بركه لكل من يقرأها ونشعر أد ايه بأيد الرب معانا وعرفان لي بالجميل لكل الشهداء والقديسين اللذين اتشفعت بيهم .
كانت ممكن التجربه تكون اقصي من ذلك كان ممكن الحادثه تؤدي الي موت اولادي الثلاثه أو زوجي وأولادي معا أو كلنا معا لكن ياتري هل كنا مستعدين كما كان مارك مستعد
ربنا أعطانا عمرجديد انا وزوجي واندرو وماريا لكي نكون مستعدين دائما لترك هذا العالم الزائل.

اشكرك ياربي والهي من كل قلبي انك رجعت لي ماريا وزوجي وابني أندرو أما ابني مارك فهو عندك يارب يتشفع لينا امام عرش النعمه واشكر الست العذراء الطاهره مريم علي شفاعتها لينا واشكر القديس العظيم ابي سيفين والقديس العظيم مارمينا والبابا كيرلس وتماف ايريني والملاك ميخائيل والقديس العظيم موسي الاسود ومارك ابني الحبيب علي شفاعتهم وشفائهم لماريا .

رجعتهالي تاني يا قديس الرب مارمينا زي ما رحت بيها ليك في عيدك اشكرك علي حنانك معانا

ماريا شافت مارك كتير في المستشفي ومعاه القديس العظيم مارمينا ومارك قالها هتشفي يا ماريا وده كان سبب تعزيه جميله لي ولزوجي .

أشكر جميع اللذين صلوا من أجلنا في كل مكان أمريكا وكندا ومصروأوربا سواء اللذين يعرفوننا أو اللذين لم يعرفونا وصلوا من أجلنا .
بركه صلواتكم هي السبب في شفاء ماريا رب المجد استجاب لصلواتكم كلها من أجلنا

إن عشنا فاللرب نعيش وإن متنا فاللرب نموت إن عشنا أو إن متنا فاللرب نحن

صلوا من أجلي ومن أجل زوجي ومن أجل ابني اندرو وأبنتي ماريا لكي يكمل لها رب المجد الشفاء الكامل حقيقي احنا كلنا محتاجين الي صلواتكم لكي يعزينا الرب ويداوي جرح قلوبنا ويرسل لنا مارك ونشعر به في كل وقت حوالينا حقيقي قلبي انا وزوجي مجروح وشعرنا اننا اتكسرنا لان التجربه قاسيه ومافيش أصعب من تجربه فراق الآبن حقيقي دايما أفتكر تجربه ابونا ابراهيم واقوله يارب انت اتحننت علي ابونا ابراهيم ورجعتله ابنه لكن انا عارفه اني مش زي ولا استاهل اني اكون زي ابونا ابراهيم لاني مش هقدر لو ربنا طلب مارك مني اني اخذ السكين وأذبحه حقيقي يارب مش هقدر لكن بتوسل اليك يارب انك تسمح انك ترجعلي مارك لو حتي في احلامي اعيش بيه واشوفه ويكون مع أخواته اندرو وماريا تاني يحسوا بيه حواليهم ومعاهم .

حقيقي انها تجربه صعبه جدا ومريره وقاسيه
لكن انا واثقه ان ربنا هيعزي قلوبنا ويرسل لنا العزاء من عنده أمين
أربع معجزات صنعها رب المجد لينا لكن المعجزه الخامسه لم تتم
وعارفه اني لا افهمك يارب ولكن أثق فيك
لآزم نكون مستعدين في أي وقت لمجئ العريس أحنا كنا فاكرين اننا راجعين البيت لكن مرجعناش وجه العريس وأخد مارك الذي كان مستعد لدخول العرس الآلهي أجعلنا يارب ان نكون مستعدين في كل وقت لمجئيك وأن نكون مثل العذاري الحكيمات لا مثل الجاهلات امين .
أذكرونا في صلواتكم كلكم
اذكرنا كلنا يامارك أمام عرش النعمه يا أبني وصلي من أجلنا لكي نذهب أليك ونكون مستعدين كما كنت انت مستعد ان تدخل الي العرس والفرح السماوي
بنحبك يامارك وفاكرينك يا أبني وحبيبي علطول ومش هننساك ابدا ألي ان نلتقي في السماء يارب

‏لست تعلم أنت الآن ما أنا اصنع ولكنك ستفهم فيما بعد" يوحنا 7:13"

الي من يقول ان زمن المعجزات انتهي ( معجزة عظيمة حدثت في مارس 2009 بالولايات المتحدة الامريكية) 59867105

الي من يقول ان زمن المعجزات انتهي ( معجزة عظيمة حدثت في مارس 2009 بالولايات المتحدة الامريكية) 59867105

الي من يقول ان زمن المعجزات انتهي ( معجزة عظيمة حدثت في مارس 2009 بالولايات المتحدة الامريكية) 19066143

الي من يقول ان زمن المعجزات انتهي ( معجزة عظيمة حدثت في مارس 2009 بالولايات المتحدة الامريكية) 79013730

الي من يقول ان زمن المعجزات انتهي ( معجزة عظيمة حدثت في مارس 2009 بالولايات المتحدة الامريكية) 90283824

لست تعلم أنت الآن ما أنا اصنع ولكنك ستفهم فيما بعد" يوحنا 7:13"

معجزة ولا الخيال الرب يباركك ديفيد
بجد مهم كتبنا مش ممكن نقول اى كلام يستحق
هذة المعجزة بركة وصلوات العدرة وجميع القدسين معنا جميعنا

بجد كنت بقرا المعجزة وانا فى حاله اندهاش تام
معجزة بجد خطيرة
ميرسى جدا استاذ ديفيد للبركة العظيمة دى

عضوفضي

إن عشنا فاللرب نعيش وإن متنا فاللرب نموت إن عشنا أو إن متنا فاللرب نحن
شكراااااااااااااا ديفيد للمعجزات الجميلة ويارب نكون مستعدين للقاء الرب
الرب يبارك خدمتك وحياتك

إن عشنا فاللرب نعيش وإن متنا فاللرب نموت إن عشنا أو إن متنا فاللرب نحن
بجد كنت بقرا المعجزة وانا فى حاله زوهول
معجزة بجد خطيرة وصعبة لاى انسان لكن ليتمجد اسم الرب بشفاعة ام النور العدرا مريم وبشفاعة ابو سيفين ومارجرجس ومار مينا والبابا كيرلس والام ايرينى والملاك ميخائيل وكل القديسين .... امين

عضوجديد

شكرا للة الذى يقودنا فى موكب نصرتة فى كل حين

عضوجديد

ان نسيت الام رضيعها فهو لا ينساة[size=18][/size]

عضوجديد

بشكرك استاذ ديفيد بس صدقنى وانا بسمع المعجزة كنت ببكى وكنت برتعش
يارب نكون مثل مارك وزى الخادم الصالح الا جيه سيده ووجده يعمل
امين

يااااااااااة معجزة ولا الخيال يارب عزيها يارب ومتسبهاش واشفى ماريا بجد معجزة رائعة ميرسى ليك ديفيد على المعجزة يارب خلينى نكون مستعدين فى اى وقت

شكرا استاذ ديفيد علي تعبك في ارسال هذه المعجزه العظيمه التي ابكتني بشده مع كل كلمه ولم استطع ان امنع دموع المنهمره الرب يكون مع هذه الام ويتمم عمله معها ويشفي ابنتها ماريا بشفاعه الست العدرا ومارمينا وابوسيفين والبابا كيرلس وجميع القديسين

عضوجديد

متشكر خالص استاذ ديفيد متعرفش قد ايه اثرت فيه المعجزة

شكرا ليك يا ديفيد معجزة فعلا ربنا يبارك لينا فيك ويحافظ عليك ويحوطك بأسراره

عضوجديد البطاقة الشخصية لقبك:

يارب ارحمنا برحمتك يارب
لا اعرف ماذا اقول غير الصبر لهذي العائلة بجد معجزة عظيمة
يارب اعطي الصبر لهذي العائلة وانشالله الشفاء والحياة الجديدة لماريا الجميلة

حد لاحظ حاجة من خلال هذه المعجزة
؟؟؟؟؟؟؟؟؟؟؟؟؟؟

عضوجديد

ليتمجد اسم الرب وهو القائل اذكرنى وقت الضيق انقذك وانجيك
فعلا" معجزة عظيمة

عضوجديد

معجزه جميلة وتعزية حلوه اوووووووووووووووووووى وياريت نكون دايما مستعدين للسماء زى مارك

عضوجديد البطاقة الشخصية لقبك:

الله يارب على عطفك وحنانك احنا ملناش حاجة فى اروحنا وجسدنا فهم ملكك يارب انت عظيم فى اعمالك انا فعلا متاثرة بالمعجزة جدا مش عارفة اقول ايه غير ربنا يرحمنا ويساعدنا ان نكون مستعدين زى مارك وشفاعة القديسين تشفع لنا امام رب المجد

عضوجديد

بجد معجزه جميله ومش لاقيه رد مناسب اكتبه لان المعجزه بجد مفيش رد ممكن يكفيها لانها عظيمه وجميله جدا

عضوجديد

فعندما شعرت بك تدق بابى انفتحت عينى ورايتك

عضوجديد

فعلا يد الرب حنينة علينا وايدة اسرع من اى يد ممتدة لنا ربنا يخلى اولادها ماريا واندرو ويعوضها فيهم انا بجد مش عارفة اكتب لان دموعى سبقانى ربنا يسمع منا جميعا ويتحنن علينا

عضوجديد

ربنا يباركك وعلى فكرة انا عندى حالة زى حالة ماريا تقريبا ونفسى تصلوا من اجلها ولو ربنا تم شفاها سوف انشر هذا فى المنتدى بكل المستندات من اشعة وتحاليل فارجوا ان تصلوا من اجلها

سارة منير كتب:: ربنا يباركك وعلى فكرة انا عندى حالة زى حالة ماريا تقريبا ونفسى تصلوا من اجلها ولو ربنا تم شفاها سوف انشر هذا فى المنتدى بكل المستندات من اشعة وتحاليل فارجوا ان تصلوا من اجلها

بصي يا سارة
عاوزك تصوري الورق والفحوصات
وتروحي بيه علي البابا كيرلس في الطاحونة
وتضعيه
وتكتبي علي الظرف
الي الأب الحنون البابا كيرلس
نحتاج لمساعدتك وشفاعتك العاجلة لأنقاذ هذه النفس

وتولعي شمعة لأم النور
وللبابا كيرلس
وتندري ندر ليهم
وان شاء الله
هسمع منك قرررريب
بأذن الله
خبر كويس

قوة الصليب المقدس
وشفاعة وصلوات ام النور
والبابا كيرلس
تكون معاكي ومع هذه النفس
امين